1 Peter 1

1Wasika yi gmi n Bitrus akun, Yesu Kristi tnu-tnuyi, Kwoi lo a Yahudiyi a Yesu viyi aba n na nya ɓa ya n Urushelima, ɓai gnami fi laɓa n Buntus, Galatiya, Kapadokiya, Asiya, n Bitniya yi nyi.

2Oma nugundo, Shekwoyi Dada ɓei kni fye tunyi n sapa, Wa ku pma kpe ge fye ɓa ze owo aɓi, Zafun Gyi-gyi-yi lo tnu-tnu lo n fya bugba mi woi zhan fye ya n Yesu Kristi ami yi, woi zhin fye fyei zhin oɓo kwo dawo, alheri n bugba-fuyi ɓa la lakpe nfya ba.

Agmada N Mwi-mwi Yi

3Mwa-mwa vinya Shekwoyi nya nu n Dadayi, eyi Dagayi Yesu Kristi nya, ntuge owo sun-sungye tnazoyi nu na gayi esa a shan yi ma. Nsaiye yi sase n na awyetu wye-wyeyi nyalo-nyalo nya yi, ntuge Kristi ɓei la laka n efi. 4Shekwoyi n cauta dnagmayi so shi owo aɓi lo n ʼshe; kwo gyi-gyi-yi lo, kwoi ta shando aigna kwo bom kwoi ta shan zom. 5Shekwoyi, dna n wo iko yakwo, wo ɓa shi fye bwa fya si ɓo n lafiyai n nabai fya bwa fya si ɓo n lafiyai n nabai fya bwa kwo, ntuge fye kpema wo lo. Kwo ɓei ze ofye nya dna n nyipyei kmaknayi n kwo ɓelo nyi zaho-zahoi wo gye. 6Ntu cenu a da fye n mwa, a gmada yakwo lo n fya bye, kwoda shike ezan dna ɓo lo n saiye kpa ntu mu-mugye ɓo nɓa ɓe fya ba nyi.

7A wahala ye ɓe da fye ntuge, a mwi fye gaiciya ga gye nu, agye kwo kwo n kalayi lo, n gyi-gyi-yi, a mwi kwo gye shi ena zhin kwo mwi zinariya gye nyi kwa zhan kwo ya, ofye gaiciya ga du zinariya lo n latu n Shekwoyi aba, ntu cenu n fye gaiciya ga migni n kalayi n kwo mutu, avun, dna n wahala abednai, kwo ɓa ɓe fye n ci-ci yi, n mwa-mwayi, n latuyi ewyi n Yesu Kristi ɓei jezeɓe nyi.

8Fye yewo lo, kwo da yake fye to shin wo gyen. Fye ta gye wo lon, ama fye kpma wo lo, kwo nsaiye a da fye lo n na gmadayi n na ta shin kwo ɓedan, 9Efye lada n na bye deye ntu fye gaiciya ga ɓo, okwonu zhin efya wye-wyeyi gni-gni.

10Gni-gni ye zhin enya nu n na anabi to ɓei n kwo awyega yin, kwo da yake ɓa ɓei ku ka nkwo tukwo, ɓa ɓei n na ɓenya-nyai mwa n kwo awyega tukwo. 11Ɓa ɓei ye ɓa kpe esa ye n ʼza yi n Kristi Zafun, nkwo ɓei dna ɓami nyi, ɓai daɓo tu n ɓa tukwo, esa wo ɓei gna ɓa ge ɓaka nya tu n Kristi azhingye tukwo n latu yi nkwo ɓa vi azhingye yi nyi.

12Aku gna ɓa ge aɓeye ta zhin n ɓa wye-wyeyi sa nun, ama nna aye begye avun nu. Nsaiye aku Nabari Manayi ye wuyi pei-pei, Aɓei zhinyi kwo waʼazi dna n iko Zafun Gyi-gyi-yi nya n wo gmi n ʼshe, n wo ɓei da ɓo n ɓai nyi kwo zhin oɓo wo-woyi nu, oɓo agmada nya njesun, ntuge har amalaika ma ɓa cei pma lo ɓa kpe ɓeye awyega. 13Ntucenu fye ku fyehin wan shi, fya pmi n na wye tuyi tu n Shekwoyi alheri nkwo ɓe fya ba lo, esa n Yesu Kristi ɓa jezeɓe cei nyi. 14Fye vi Shekwoyi ɓo, ntu ge fye zhin owo aɓi nu, fye to jezelo fya zokwo kwokwoyi ɓenukwoyi zhin nyam, ntuge fye to ɓei zhin fyei kpe ɓemanai ye num. 15Ama fye ku ze agyi-gyiyi n ɓeho-ɓehoi nfye zhin, ngye shi Dagayi zhin gyi-gyi-yi nu n wa yi fye nyi. 16A cei kafi lo n Littafi ge, “Fye ku ze a gyi-gyi-yi, ntuge Mi gyi-gyi-yi lo.”

17Fye pa ge, ofye Dada nfye zhin aduwa ga wo dna n ʼshe nyi, wo ta kni za kni-kni, esa n wa da owa cei n. Wo ɓei daho wa cewo n tna gyifi tu n nyaho-nyahoi tukwo n ha zhin, ntucenu zhin ɓeho-ɓehoi n wo dna woi ɓe kafin ho si eshe.

Aku Ota Gba

18Shekwoyi ɓei gba efye shan-shan agyiwye ntuge wa gni fye n zokwo n kwo to ɓei ɓa lo fyei n ʼshen n fye azakwoi ɓei wan nyi, tagba n wo ɓei gbani zinarya nu ton kwo azurfa shi fye shin fye nya kpelo. 19Ama wo ɓei gba n Kristi ami gyi-gyiyi nu, Shekwoyi kugya n tna laifi n tna ecigusa. 20Shekwoyi ɓei kni wo tunyi n sapa to ai zhin anyin, ama n na anyipyei kmaknayi ye kwa ze anabarka n fya ba.

21Ntu cenu efye gaiciya ga nyi n Shekwoyi nu n wo ɓei la Kristi kala n efi, wa gawo mwa-mwa n jesun nyi. Nsaiye efye gaiciya ga n na wyetui ɓa bwa kpema n wo nu gmanyi. 22Nsaiye fye ɓa mi fya ye n na zai n tuge ala fya bugba zhan ya n tukwo ye yi, n nuwun yi, esa n fye ɓei kpema Kristi wa gni fye nyi, ntucenu fye ku kpe lalei ge fye ku yelo n jei, n bugbai gmanyi.

23Ntuge fye n wye-wyeyi woi-woyi lo, fye to ɓei bwakwo n fya zakwoyi nun, ntuge wye-wyeyi n ɓa ɓei ga fye nyi kwo ɓa zo, woi-woyi deye ta shan zon, ntuge kwo gmi n Kristi nu - Shekwoyi Ɓeda wye-wyeyi n na za aba. 24E, eya wye-wyeyi anyinya ɓa zo, she a gbe-gbe zhin ɓa bmi ɓa wo akawu nyi. Zanyikwoci latu bwa wu ngye ama-mawyi nu n ɓa bwa ɓa kaya nyi. 25Ama Shekwoyi ɓeda ɓa gni-gni har nyalo-nyalo. Owo ɓeda ye nu zhin Nabari Manayi n na ɓei zhin fye kwo waʼazi nyi.